Plantun de Prouvènço

Pèr coumpara dos planto d'encò nostre

Galium parisiense & Eupatorium cannabinum

Galium parisiense

Rubiaceae

Nom en français : Gaillet de Paris.

Descripcioun :
Aquesto reboulo, proun coumuno, trachis dins li tepiero seco de roucaio e de colo. Se tèn bèn dre emé de tijo ramificado que porton en bout lis enflourejado. Li fueio an de formo en lanço, bourdado de pichòti dènt que rintron en dedins e s'acabon emé un benc de mai de 0,1 mm. Coumpara emé la reboulo-divaricado que ié sèmblo proun .

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : Pancaro entresigna
Fueio : verticilado
Tipe bioulougico : Teroufite
Cicle bioulougico : Planto de l'an

Gènre : Galium
Famiho : Rubiaceae

Ordre : Gentianales

Coulour de la flour : Blanco
Petalo : 4
Ø (o loungour) flour : Pancaro entresigna
Flourido : Printèms

Sòu : Ca
Autour basso e auto : Pancaro entresigna
Aparado : Noun

Liò : Tepiero seco - Roucaio - Colo - Basso mountagno
Estànci : Termoumediterran à Coulinen
Couroulougi : Pancaro entresigna
Ref. sc. : Galium parisiense L., 1753 (= Galium parisiense subsp. parisiense )

Eupatòri

Eupatorium cannabinum

Asteraceae Compositae

Àutri noum : Canebe-fèr, Carbe-fèr, Epatorium, Capoun.

Noms en français : Eupatoire à feuilles de chanvre, Eupatoire chanvrine.

Descripcioun :
Planto renadivo un pau grando (>1m), bourrihudo, emé de cambo rouginasso, e que s'arremarco emé si flour roso à blanco coumpausado de flouroun en tubo. Li fueio dóu bas, óupousado, soun divisado en fuioun que dounon d'èr à-n-aquéli dóu canebe.

Usanço :
L'éupatòri èi couneigu pèr èstre vertuous contro li problèmo de fege (coulagogue) e de rèn. S'emplego de maceracioun de flour, fueio e racino. Pamens, estènt douna la presènci d'alcalouïde èi counseia de pas n'en prendre de longo.